Ислом Нури
Мақолалар
|
||
|
|
||
Ислом Нури
Мақолалар
Қизалоқнинг онасига унсиз қилган нидолари...
Ёки ҳолат тили билан деганлари
Ассаламу алайкум онажоним.
Ҳурматли онажоним...
Қуръони Каримда зикри келган, яхшилик қилишимиз бизларга фарз бўлган, қадамлари ости жаннат онажон...
Онажон мени яхши кўрасизми?!...
Мени яхшилик ва зафарларга эришмоғимни сиз ҳам орзу қиласизми?!...
Мени ёшлигимда ҳам, катта бўлганимда ҳам сизга яхшилик қилувчи фарзанд бўлишимни хоҳлайсизми?!...
Сиз мени дунё ва охиратда саодатли, солиҳ мусулмон бўлиб вояга етишим учун ҳаракат қиляпсизми?!...
Онажон менинг сиз учун айтмоқчи бўлган, дилимда яширинган сўзларим ва сўроқларим бор. Мени калб қулоғингиз билан тингланг! Онажон! Мен сизни ва отамни хушнуд этиб, сизларга хизмат қиладиган яхши фарзанд бўлсам деб орзу қиламан. Сиз ҳам шуни орзу қиласизми?.
Онажон! Хафа бўлмангу мен сиздан норозиман. Негаки, сиз олдимга мана бу “зарарли нарсалар”ни қўйиб қўйдингиз. Ота-онангиз сизга бундай қилишмаган, ёмонликлар тарқалмаган у кунларда ақл ва фикрингизни булғатмай, соғлом сақлаб сизга исломий тарбия бериб вояга етказишган. Онажон сиз нима учун мени ақлимни, фикримни, руҳимни булғаб унга зарарли микроблар туширадиган телевизор, компютер ва интернет олдига ўтқазиб қўйдингиз? Нима? Мени яхши кўрмайсизми? Менга яхшилик тиламайсизми? Сиз нима учун мени ўзингиздаги буюк исломий фикр ва қадриятлар билан тарбия қилмайсиз? Нега сиз мендан – ҳатти-ҳаракатларимдан, тўполонларимдан қутулмоқчи бўлиб, мени мана шу вайронагар жиҳозларга топшириб қўйдингиз?
Нима учун?! Онажон, мени яхши кўрмайсизми? Нима учун?! Айтинг онажон?
Ахир мен боқиб, семиртириб кейин сўйиб юбориладиган қўй эмасманку!? Йўқ! Йўқ! Онажон сиз асло унутманг, қиёмат куни Аллоҳ таоло олдида сизни ёқангиздан тутиб, даъво қиламан. У кун одам ака-укаларидан, хотин, бола-чақаларидан қочадиган кундир. У кунда афсус-надоматлар фойда бермайди. Билингки, сиз тарбиячимизсиз! Тарбиянгиздагилар ҳақида жавобгарсиз!
Онажон мен соғлом фитрат устида мусулмон бўлиб туғилганман. Сиз мени салбий таъсирли нарсалар билан бузиб қўйманг. Сиз бепарво ҳолда менинг шууримни, ақлимни, қалбимни мажруҳ этмоқдасиз, иймонимни, ахлоқимни бузмоқдасиз. Сиз учун муҳими менинг жасадим соғлом бўлса, бас. Аммо менинг ичим тўла жароҳат, қалбим вайрон. Сиз эса, менинг мурғак қалбимдаги бу жароҳатларни кўра билмаяпсиз!
Онажон нима учун олийликка интилмайсиз? Нега мени Роббил Оламийн ҳузурида мақбул инсон бўлишимни истамайсиз? Нечун менга доимий яхшилик, абадий зафарни тиламайсиз?
Онажон! Жоним онам! Менга охират имтиҳонидан ўтиб олишимда ёрдам берадиган нарсаларни таълим беринг. У куннинг имтиҳонидан йиқилганни қайта имтиҳонга қўйилмайди.
Онажон мен ҳақимда Аллоҳдан қўрқинг! Она, сиз мени йўқ бўлиб кетадиган ҳаёт учунгина тарбия килманг! Она, куч-қувватингиз борида, кексаймай туриб менга яхшилик қилинг! Аллоҳга шукрки, сиз ўқимишли, онгли, диний билимга эга мусулмон онасиз. Менга зарарли эмас, фойдали нарсаларни таълим беринг! Онажон сиз агар мени улуғ қадриятлар, гўзал ахлоқлар билан тарбиялаб вояга етказсангиз сизга бу дунёда катта ажру-савоб бўлади. Охиратда бериладиган мукофотлар эса беҳисобдир. Агар менга Қуръон ёдлатсангиз Қиёматда бошингизга "Тожул вақор"ни кийдираман. Она мен сизнинг жигарпорангизман. Мени яхши кўришингизни исботланг, онажон!
Меҳрибон онажон, дугоналарингиз, қўшниларингиз мендан кўра афзалми?! Сиз мени диним ва хулқимни бузиб, вайрон қилиб ташлайдиган мана бу ажина – шайтонлар олдида қолдириб, дугоналарингиз ва қўшниларингизникига чиқиб кетаверманг! Мен ва укаларим сиз учун етарли овунчоқ эмасмизми?
Онажон сиздан илтимосим, бизнинг таълим-тарбиямиз учун гўзал режа тузиб ўша бўйича биз билан машғул бўлинг! Сизнинг садоқатингизга бошқалардан кўра биз ҳақлимиз. Биз тарбиянгизга, меҳрингизга ва доимо биз билан бирга бўлишингизга муҳтожмиз, онажон. Чунки, сиз ўзингиздаги фитрий меҳру-маҳаббат билан бизга холис насиҳат қила оласиз. Сизнинг насиҳатингиз эса, бошқаларнинг – ҳатто устозларнинг насиҳатидан ҳам таъсирлироқдир.
Онажон! Менинг нидоларимга қулоқ тутиб, орзуларимни рўёбга чиқарасиз деб умид қиламан.
Ислом Нури веб саҳифаси
