Жума 24 Ноябрь 2017 | 5 Рабиул-аввал 1439 Ҳижрий-қамарий

асосий қисм

  • lotinchaga
  • +
  • -
  • |

051. Ғуслни вожиб қиладиган амаллар

1987 марта кўрилган

Аллоҳ таоло «Моида» сурасининг 6-оятида шундай дейди:

وَإِنْ كُنْتُمْ جُنُبًا فَاطَّهَّرُوا

«Агар жунуб бўлсаларингиз, чўмилингиз!»

«Бақара» сурасининг 222 - оятида эса:

وَيَسْأَلُونَكَ عَنِ الْمَحِيضِ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ وَلَا تَقْرَبُوهُنَّ حَتَّى يَطْهُرْنَ فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللَّهُ

«Сиздан ҳайз ҳақида сўрайдилар. Айтинг: У кўнгилсиз-нопок нарсадир. Бас, ҳайз пайтида аёлларингиздан четланингиз ва то (ҳайздан) тозаланмагунларича уларга яқинлашмангиз! (Ғусл қилиб) покланганларидан кейин уларга Аллоҳ буюрган тарафдан келингиз.»

عَنْ أبِي هُرَيْرَةَ رَضِيَ اللهُ عَنْهُ قالَ: قالَ رَسولُ اللهِ صَلَّى اللهُ عَلَيْهِ وَسَلَّمَ : إِذَا جَلَسَ بَيْنَ شُعَبِهَا الْأَرْبَعِ ثُمَّ جَهَدَهَا فَقَدْ وَجَبَ الْغسْلُ (متفق عليه). زاد مسلم: "وَإِنْ لَمْ يُنْزِلْ" وفي رواية: "وَمَسَّ الْخِتانُ الْخِتانَ".

Абу Ҳурайра розияллоҳу анҳу ривоят қилган муттафақун алайҳ ҳадисда Расулуллоҳ соллаллоҳу алайҳи ва саллам: «Агар киши аёлининг икки оёғи орасига ўтириб ҳаракат қилса, ғусл вожиб бўлади», дедилар.

Имом Муслим ривоятида эса “агарчи маний тўкмаган бўлса ҳам” деган қўшимча бор.

Бошқа ривоятда эса “ва икки жинсий аъзо бир-бирига қўшилса” деганлар.

عَنْ عائِشَةَ رَضِيَ اللهُ عَنْها أَنَّ رَسُولَ اللهِ صَلَّى اللهُ عَلَيْهِ وَسَلَّمَ قالَ: "إِذَا أَقْبَلَتِ الْحيضةُ فَدَعِي الصَّلاةَ، وَإِذا أَدْبَرَتْ فَاغْتَسِلِي وَصَلِّي" (رواه البخاري).

Имом Бухорий Оиша розияллоҳу анҳодан ривоят қилган ҳадисда Расулуллоҳ соллаллоҳу алайҳи ва саллам: «Агар ҳайз келса намоз ўқиманг, кетганидан сўнг ғусл қилиб, намоз ўқинг», дедилар.

عن علي بن أبي طالب رضي الله عنه قال: "كُنْتُ رَجُلاً مَذَّاءً فَاسْتَحْيَيْتُ أَنْ أَسْألَ رَسُولَ اللهِ صلَّى اللهُ عَلَيْهِ وَسَلَّمَ لِمَكانِ ابْنَتِهِ مِنِّي فَأَمَرْتُ الْمِقدادَ بْنَ الْأَسْوَدَ فَسَألَهُ، فَقالَ: اِغْسِلْ ذَكَرَكَ وَتَوَضَّأ (متفق عليه).

Муттафақун алайҳ бўлган ҳадисда Али ибн Абу Толиб розияллоҳу анҳу шундай дейдилар: Мен сермазий одам эдим. Расулуллоҳ соллаллоҳу алайҳи ва салламга куёв бўлганим учун У кишидан сўрашга уялиб, Миқдод ибн Асвадни сўраб беришга буюрдим. Расулуллоҳ соллаллоҳу алайҳи ва саллам: «Олатингни юв ва таҳорат ол» дедилар.

Шарҳ:

Расулуллоҳ соллаллоҳу алайҳи ва саллам аёлига яқинлашган одамни – гарчи маний тўкмаган бўлса ҳам – ғусл қилишга буюрган, шунингдек ҳайз ёки нифос кўрган аёл ҳам покланганидан кейин ғусл қилиши лозим.

Бугунги дарсдан олинадиган фойдалар:
  1. Аёлига яқинлик қилган одам маний тўкмаган бўлса ҳам ғусл қилиши лозим.
  2. Тушида эҳтилом бўлиб, уйғонгач, баданида ё либосида ҳўллик асарини кўрган одам ғусл қилади.
  3. Мазий чиқса ғусл вожиб бўлмайди, балки олатни ювиш ва таҳорат қилиш кифоя қилади.
  4. Ҳайз ёки нифос кўрган аёл тозаланганидан кейин ғусл қилиши шарт.